छोरिया म्हारी गाओ ये बजाओ गढ़ की गुजरिया
म्हारा नारायण का गाओ मंगला चार ,,,
म्हारे देव पधारिया पावणा ॥
थाने धन्य धन्य म्हारी मालासेरी डुंगरिया ।
वठे जन्मिया जन्मिया त्रिलोकी का नाथ ॥
नारायण आया पावणा……
सैया मारी कंकर फुटिया कवल निकल्या ।
ये तो कवला में लियो अवतार ॥
नारायण आया पावणा……
देवजी जन्मते बाज्या चंग ढोलडा ।
या तो महला में बाजी सोवन ताल ॥
नारायण आया पावणा…….
हीरा म्हारी पीली गोबर की देदे गुंरली ।
हीरा म्हारी मोतियाँ का चोक पुरायनारायण ॥
नारायण आया पावणा…….
हीरा म्हारी जाओ जोशी ने बेगो बुलावज्यो ।
म्हारा नारायण को निकलवा लेवा नाम ॥
नारायण आया पावणा…….
जोशी जूना पुराना काड़ो टिपणा।
म्हारा उदल को कडवा लेवो नाम ॥
नारायण आया पावणा…….
नारायण पीरु भोपा की सुणज्यो विनती।
देव जी गावे गावे थांका गुण गान।
भक्ता ने लजिया राक ज्यो ॥
नारायण आया पावणा…….
देव जी चम्पा लाल शरण मे आवयो ।
देव जी नित उठ देवे चरणा माये धोक ।
वांकी नैया पार लगावज्यो ॥
नारायण आया पावणा…….
